2 ka midwife gitulis samtang nag-duty

Ni Dong Arañez

HILABIHANG kadako sa lubat nga gibati sa duha ka komadrona human sila tulisa samtang nag-duty sa district health center sa Simangan, ning syudad niadtong Enero 13. Ang mga biktima mao sila si Fe Sambroso, 54-anyos, minyo ug residente sa Punta ug ingon man si Shera Jean Radin, 40-anyos, minyo ug nagpuyo sa Bagong Buhay, ning syudad.

Sa imbestigasyon nga gipahigayon sa kapulisan, nahibaw-an nga pasado 4:00 sa kaadlawon samtang nahinanok ang duha nisulod ang tulisan sa luyong bahin nga pultahan sa health center armado og kal.45 nga rebolber. Mailhan nga hubog ang gikatahapan ug walay gisul-ob nga tsinelas.

Gisukit-sukit pa ang mga biktima kon duna ba daw pasyente. Wala makuntento ang tulisan diriyot panamastamasi si Radin apan tungod sa kahadlok nalooy lang usab kini. Gibana-bana nga nagtambay og duha ka oras ang maong tulisan ug gihapit og tulis ang health center dayon biya.

 

Nakuha ang P3,100 nga salapi ni Sambroso ug duha ka cellphone nga tag-P4,500 samtang si Radin nasakiyo ang iyang Nokia cellphone nga nagkantidad og P8,900. Wala kini bali pero ang lubat dili gyud kabayran bisan pa pila ka libo. Nagduda ang Theft and Robbery Section nga sakop sa walhon nga pundok ang maong tulisan.

Nagmotor patay sa disgrasya

Lumping ang atubangan sa mini-bus diin naparok ang ulo ni Lison.

Ni Dong Arañez

PATAY ang usa ka ulitawo nga luwan og motorsiklo dihang gikasungag niya ang usa ka mini-bus niadtong Enero 12 sa Camp Downes, ning syudad. Ang biktima usa ka Joly Lison, 26-anyos, nagpuyo sa Linao, ning syudad ug nagtrabaho sa Binabaye Primary Multi-Purpose Cooperative.

Sa gipahigayong imbestigasyon sa Traffic Division, nasayran nga nagsakay si Lison og motorsiklo paingon sa lungsod sa Albuera aron manukot. Pag-abot niya sa highway sa Camp Downes, ni-overtake siya sa nag-una ka niyang Toyota Hi-lux van. Apan duna sad nagsingabot nga mini-bus nga gimaneho ni Edgar Eloisa, 50-anyos nga nagpuyo sa Southern Leyte.

Kusog usab ang dagan sa ka-engkwentrong mini-bus nga gikan sa lungsod sa Baybay kay nag-apas sa oras. Nagkabangga ang duha ka sakyanan ug nilagpot ang motorsiklo lakip na si Lison ug sa dihang nitugpa na gibawian sa iyang kinabuhi gumikan sa kaguba sa iyang ulo nga wala na gyud hapit mahitsura tungod sa kakusog sa impact.

Duha ka hubog naghasi

Ni Dong Arañez

DUHA ka hubog nga nag-eskandalo sa merkado publiko ang gidakop niadtong Enero 13. Ang mga kanahan giila nga sila si Rolando Aro, 29-anyos, minyo ug nagpuyo sa Sitio Sooc, Curva, dinhi sa Ormoc, ug ingon man si Elmer Entino, minyo ug residente sa Nadongholan, ning syudad.

Nasayran nga nagpahigayon og patrolya ang mga sakop sa React Team base sa gipatuman nga Operation Bakal nianang 10:00 sa gabi-i dihang ilang nasiplatan ang duha nga gikan sa Sabino Videoke Bar ug hilabihan nang lantuka. Ilang gisita ang duha apan bastos kaayo ug ginganlan ang mga pulis og panuway.

Tungod niini, gidakop sila sa pulis aron i-safety apan nagsinggit-singgit naman hinuon. Nakuhaan pud ang usa ka nila og mahait nga balisong. Walay nahimo ang kapulisan gawas sa pagdala sa duha sa Presinto 1 diin didto gipapahuway ug gipagawas human sa ensaktong gidugayon kon tagal nga tilatid sa balaud alang sa mga napreso.

(West Leyte Weekly Express, Jan. 10-16, 2011)

Mag-uuma nuwang sa away maoy gidunggab

Ni Dong Arañez

USA ka mag-uuma ang nadunggaban dihang ni-uwang siya sa away sa managsoon niadtong Enero 9 sa Libertad, dinhi sa Ormoc. Ang nalandig sa Ormoc District Hospital mao si Rodrigo Ocang, 55-anyos. Samtang ang gikatahapan ginganlan og Apolinario Sedillo, 42-anyos, minyo. Silang duha nagpuyo sa maong barangay.

Sumala sa pasiunang imbestigasyon, nasayran nga nag-inom ang duha sayo pa sa buntag uban sa igsuon ni Sedillo nga si Renato, 38-anyos, minyo tungod kay pista sa maong dapit. Pagka-1:00 na sa hapon dihang igsakto na sa karga, nag-away ang managsoon ug gibunal-bunalan ni Apolinario og kahoy ang iyang manghod.

 
Nisuway og uwang si Sedillo aron mapakgang ang gibuhat ni Apolinario apan siya naman ang giatubang sa gikatahapan ug gidunggab siya sa tuong ilok gamit ang kutsilyo nga 32 ka pulgada lakip na ang pul-an niini. Gidakop ang gikatahapan sa tanod, gisakiyo ang hinagiban nga hilabihang taasa ug gidala sa Presinto 3.
(West Leyte Weekly Express, Jan. 10-16, 2011)

Sekyu tulog gikawatan og armas

Ni Dong Arañez

USA ka security guard ang gikawatan sa iyang armas gumikan kay patulog-tulog sa pansitan niadtong Enero 16. Ang reklamante mao si Santoni dela Cruz, 27-anyos, ulitawo, nagtrabaho sa GGC Security Agency ug nadestino sa Gaisano Capital nga nahimutang sa Dist. 6, ning syudad.

Sumala sa iyang saysay atubangan sa desk officer on duty nga nag-duty siya sa naasoy nga higanteng tindahan. Nianang mga 3:00 sa kaadlawon, gibati siya’g sakit sa tiyan tungod sa ulcer hinungdan nga nilingkod siya ug gisulod niya ang iyang kal.38 nga rebolber nga dunay marking Damco sa bulsa sa iyang jacket. Giangkon niya nga nakatulog siya ug sa pagmata niya nakita niya nga gilaslas na ang iyang jacket ug nawala na ang kargada niyang pusil. Hilabihang libot niya tungod sa kabalaka apan wala na gyud mabawi pa ang maong pusil.

(West Leyte Weekly Express, Jan. 10-16, 2011)

Mga mangunguot misiaw na sad

Ni Dong Arañez

DUHA ka insidenteng pangawat ang nahitabo niadtong Enero 13 sa hapon diin ang usa ka biktima kawani sa lokal nga kagamhanan. Ang biktima ginganlan og Elsie Jaca, 37-anyos, minyo, nagpuyo sa San Isidro, ning syudad ug nagtrabaho isip sentinel nurse sa City Health Office.

Matud ni Jaca nga nagbagtas siya daplin sa Aviles gawas sa Dunkin’ Donuts sa Dist. 7, ning syudad pasado 6:00 sa gabi-i aron musakay na pauli dihang gidikitan siya og lalaki ug sa walay langan gilabni ang iyang Nokia nga cellphone nga nagkantidad og P5,000 ug nidagan sa walay tino nga direksyon.

Nianang pasado 5:00 sa hapon, usa ka field inspector ang gikawatan samtang naglakaw sa dalan. Ang nireklamo sa kapulisan mao si Edwin Tumampo, 31-anyos, nagpuyo sa Punta, ning syudad. Matud sa iyang reklamo nga nagbaktas siya sa dalan Mabini, Dist. 4 pasado 5:00 sa hapon padulong sakayan og tricycle. Wala siya kaalingat nga gihinay-hinay na diay og siklot ang iyang dalang DVD player ug duha ka cellphone nga Nokia 3510 ug 3600.

Sa laing bahin, usa ka call center agent ang gikawatan og pouch samtang naglukat og tiket sa barko niadtong Enero 15. Ang nagpaabot sa iyang problema sa Presinto 1 ua ka Leah Lacandasa, 32-anyos, dalaga ug lumad nga taga-lungsod sa Dulag. Base sa iyang saysay nga naglukat siya og tiket sa dalan Rizal pasado 7:00 sa gabi-i ug samtang naglingkod siya gihinay-hinay diay og siklot ang iyang itom nga pouch nga dunay sulod nga P640 nga kuwarta ug mga ATM cards sa UCPB, ug Metrobank.
(West Leyte Weekly Express, Jan. 10-16, 2011)