Monica Sacay sunod nga Sarah Geronimo?

(Chika in 'd City column ni Kimberly Urboda)
NIULI ang Star Power finalist nga si Monica Sacay dinhi sa Ormoc niadtong katapusang semana sa Disyembre aron magpasalamat sa mga Ormocanon nga nibotar ka niya pinaagi sa pag-text sa giapilan niyang singing contest. Niatubang sad siya sa local media para sa usa ka pakighinabi.

Ang pirmerong amateur singing contest nga giapilan si Monica mao ang sa Cable TV Singing Star niadtong 8-anyos pa siya. Nidaog sad siya sa Leyte Idol niadtong 2007. Karon nga 16-anyos na siya, si Monica ang gihatagan og titulong Singing Darling of Leyte sa Star Power ni Sharon Cuneta.

Kabahin sa gitagna sa among editor nga si Felix N. Codilla III nga mamahimo siyang mosunod sa agi ni Sarah Geronimo, mitubag si Monica nga walay makatupong sa kasikat sa pop princess. Apan kung maartista na gyud siya, gusto niyang mahimong pirmerong leading man si Bret Alan Jackson sa Pinoy Big Brother tungod kay parehas kini og nawong kang Justin Bieber nga maoy ultimate crush niya.

Sa dihang gipangutana siya kinsay mga crushes niya sa ABS-CBN, gi-mention ni Monica ang singer nga si Richard Poon nga parehas og nawong sa nipanaw niyang amahan. Admire sad kuno siya kang Eric Santos nga permanente nilang makakuyog sa mga mall shows tungod kay pirmi kini maghatag og advices ka nila. Alegre sad kauban si Billy Crawford tungod sa sige niining katawa. Bisan panagsa lang sila magkuyog, bilib sad si Monica sa pagka-humble ni Christian Bautista bisan pa’g international singer na kini.

Kabahin kang Sharon Cuneta, saludo si Monica sa pagka-buotan sa Megastar nga matud niya angayan gyud himoong role model. Bungingis kuno si Ate Shawie ug mahinatagon. Gani nagkagamo si Monica sa kadaghang regalo nga nadawat niya kang Ate Shawie niadtong Pasko.

Mao kini ang mga maayong pamatasan nga gustong makuha ni Monica hangtod sa makab-ot niya ang pangandoy niyang mahimong popstar. Sa mga gustong mubotar ni Monica, pag-text og SPOWER MONICA ug ipadala sa 2331 para sa Globe, TM, Sun ug Bayantel, ug 231 para sa Smart ug Talk ‘n Text.

Minyo na si papa?

KUMUSTA sa atong mga higala ug tigbasa nga grabe nagtikadaghan na gyud kay hasta sa Internet naa nay magpatambag sa ako. Mukalit lang og tungha sa Facebook ang ilang mga mensahe kay gusto mangayo og tambag. Ako na gyud ning i-career ang pagpanghatag og mga tambag. Naa koy nadawat nga mensahe sa FB nga nangayo gihapon og tabang:
Hi, gud pm. Gusto ko sanang humingi ng payo kasi may nobyo ako tapos marami ang nagsabi na may asawa na daw siya pero ang sabi niya sa akin wala raw. Pero inamin niya na may anak siya. Tapos may nag-text din sa akin na nagpakilala na asawa niya pero ang sabi ng nobyo ko wala daw talaga siyang asawa. Ang daming tutol sa relasyon namin, di ko na alam kung saan maniniwala. Naguguluhan na talaga ako, sana po matulungan nyo ako. – From Ging2x
Dear Ging-ging,
Wala ka mag-ingon kabahin sa personalidad nimo pero mura’g dalaga ka pa ug naa na sa ensakto nga edad. Sayon ra kaayo ang imong buhaton Ging. Ila-ilaha ang imong uyab apil ang iyang pamilya. Hangyoa siya nga dad-on ka sa ilang balay aron makaila nimo ang iyang pamilya ilabina ang iyang anak.
Bisan gud og walay okasyon pagdala lang og regalo para sa ila aron pod malingaw sila. Kung toa na ka sa ila, makuha na nimo ang mga tubag sa imong mga pangutana. Kay kung muadto ka sa ilang pinuy-anan, naa gyud kay maka-istorya bahin sa imong uyab sama sa kung asa na ang inahan sa iyang anak ug kung unsa nay ilang kahimtang. Ug kung tinuod man gani nga naa na siyay asawa, masultihan pod ka nila.
Kung dili gani siya musugot nga muadto ka sa ila, naa gyud siyay gitago. Kung mao na, ang sunod nimong buhaton ikaw na lang mismo ang mangadto sa ila. Musuroy ka lang. Pangimbestigar gamay sa mga silingan aron naa kay makuha nga mga impormasyon bisa’g gamay.
Tengali tinuod ang giingon sa imong uyab nga wala siyay asawa kay dili sila kasal sa inahan sa iyang anak. Mao nga naka-ingon ang mga tawo nga naa siyay asawa kay basta baya mag-ipon na, asawa na baya ang tawag ana dayon. Mao nay angay nimo nga masayran. Puwede ra man pod nimo ipangotana sa imong uyab ba, imo man masabtan kung magsulti sa tinuod o dili ang tawo.
Bahin adtong nag-text nimo nga nagpaila nga siya ang asawa, texa pud siya. Pwede ka makig-istorya sa iya in person. Dili man na dautan. Kung unsa may makuha nimong mga impormasyon, makahibalo na ka unsay buhaton. Kung madiskubre nimong tinuod nga naa siyay asawa ug kasado na, biyai siya. Set him free kay naa pay daghang mga lalake sa palibot.
Pero kung dili gani tinuod, angay nimong saligan ang imong uyab kay walay laing makapalig-on sa kada relasyon, kini ra gyung pagsalig. Kung imong masabtan nga ulitawo gyud siya, start building your own dreams. Ayaw paminaw sa mga tsismis diha sa palibot kay mao na makaguba sa inyo.

Enskato ba ang Truth Commission ni PNoy?

(Column ni Mr. Lungsoranon)
ADUNA bay taksanan sa tinguha sa pag-alagad sa Lungsod? Aduna bay taksanan sa imong gugma ug pag-ilob? Ang mosunod igo na tingaling makapasabot kaninyo unsay kahulogan sa pulong Taksanan. Sugod niining semanaha, atong sugdan ug bunyagan ang bag-ong Lindog Taksanan.
Isip yanong Lungsoranon, mikuyog ko sa bagang duot sa katawhan nga misalig ug mituo sa sinserong tinguha sa bag-o tang Presidente Noynoy Aquino, gani bation ko’g kalagot kon makabati ko nga dauton ang Presidente.
Nganong ato man dayon hukman ang atong Presidente pipila pa lang gani ka bulan ang iyang paglingkod? Nganong dili man nato siya hatagan og higayon nga maladlad ang kinatibuk-an sa iyang mga programa? Unsa ug hain man ang apan sa pagdumala ug pagpadagan sa Presidente sa iyang administrasyon?
Dili tingali malalis ang kinsing-kasing tinguha sa atong Presidente pag-alagad kanato. Apan dili mahimo ni Pnoy nga siya lang ang magpadagan sa gobyerno sa Pilipinas. Nagkinahanglan siya’g
mga katabang ug mga adviers nga modumala sa nagkalain-laing ahensya sa atong panggobyerno. Mga tawo nga adunay maayong track record. Wala mahilambigit sa mga anomalya sa diha pa sila mag-alagad sa mga pribadong negosyo ug kompanya. Mga magtatambag nga nakahimo’g ilang ngalan sa linya sa ilang pagka abogado, doktor, inhenyero ug public administrator.
Subo nga palandongon nga ang unang Executive Order nga giluwatan sa Malacañang gibawi kay depektoso. Kinahanglan konong korhi-an, amendahan ang pipila ka parapo niini. Ang pangutana, wala diay kasaligan ug de campanilyang mga legal advisers si Pnoy?
Laing kuwestionable nga EO nga wala tingali mahashasi pag-ayo sa iyang mga legal advisers mao ang EO No. 1 nga magtukod og Truth Commission. Si Rigoberto Tiglao sa iyang lindog nga gi-uloha og Outlook nga napatik sa Philippine Daily Inquirer niadtong Disyembre 8, 2010 mipagawas sa iyang opinyon nga may kalabutan sa EO No. 1 kun Truth Commission.
Matud ni Tiglao, ang EO No. 1 ni Pnoy nga magtukod sa Truth Commission mora’g gikopya sa EO No. 1 nga gipakanaug sa iyang inahan nga si Cory Aquio niadtong Pebrero 28, 1986 nga nagkanayon sa Eninglis, “whereas there is an urgent need.” Ang kang PNoy EO No. 1 nagkanayon sa Eninglis “whereas there is an urgent call.”
Ang EO No. 1 ni Presidente Cory nagmando paggukod ug pagpangita sa gitouhang ill-gotten wealth sa Presidente nga ilang napakanaug ug nahinginlan sa katungdanan. Ang EO No. 1 ni PNoy nagmando sa pag-imbestigar sa gitahapang graft and corruption sa miaging administrasyon.
Ilang nakalimtan ug nataligam-an nga ang kang Presidente Cory nga EO nga gipagawas 24 anyos na ang milabay sa dihang iyang gipangulohan ang gitawag nga Revolutionary Government ug atol niana, iyang gikuptan ang gahum sa Ehekutibo, Lehislatura ug Hudikatura. Ug makatukod siya og mga ahesya sa gobyerno apil na ang sa hudikatura.
Si Presidnete PNoy dili makahimo niana karon, matud ni Tiglao, tungod kay ang sistema sa gitawag og check and balance uban sa Kongreso ug sa Hudikatura nagpabiling lig-og ug kinasing-kasing gituman. Nakalimot tingali ang mga advisers ni PNoy nga duha pay Kongreso nga kinahanglan mohatag kang PNoy og gahum ug katungod usa pa siya makapanaug og amnestiya sa mga rebelde. Lahi sa panahon ni Cory nga wala kadtoy Kongreso tungod kay Revolutionary Government man, mao nga insigeda si Cory makahatag dayon og amnestiya sa mga rebelde.
Si Minority Leader Edcel Lagman sa iyang gula sa Inquirer niadtong Disyembre 13, 2010 nagkanayon nga ang EO No. 1 nga gipakanaug ni PNoy nakasupak sa gitawag og Equal Protection Clause sa Konstitusyon. Tungod kay ang gitutukan ug gipaimbestigahan mao ra man ang giingong mga kasal-anan nga nahimo ug gibuhat sa administrasyon ni Presidente Gloria Macapagal-Arroyo.
Si Kongresista Lagman midugang nga ang atong Batakang Balaod naglatid sa Doctrine of the Separation of Powers sa tulo ka sanga sa atong kagamhanan: ang Ehekutibo, Lehislatura ug ang Hudikatura aron mapatuman ang giingong check and balance sa atong panggobyerno.
Ang akong amigong insik mikomentaryo, “Ako Mr. Lungsoranon libog kinsa ba sulti tinuod.” Hinaut sa dili madugay molugdang ra ang kamatuoran. Hangtud sa sunod semana … Salamat.

Bugas, bugas nganong nimahal ka?

(Column ni Nards Melendres)
BUGAS! Bugas! Nganong nimahal ka? Kini ba ang matang sa bag-ong tuig nga among saulogon? Taliwala sa kapit-os sa among kakabus, sa nagkutoy namong mga tiyan? Sa nagsangkiig nga kalisod sa pagpangita og buhat! Kawalay trabaho nga kasudlan!
Mao ba kini ang matang sa kalbaryo inay kalipay unta ang amog sugaton niining bago-ong tuig? Ang bag-ong tuig gud timailhan man unta sa kasadya ug kahimungaya sa atong katawhan. Apan naunsa bang pagkaunsa nga mitaas ang presyo sa bugas, sa mga sugnod, asukal, harina, mantika ug labi na gayod ang LPG nga gikinahanglan kaayo sa mga tawo.
Naunsa ba kining mga tawo sa atong kagamhanan ilabina si Lito Banayo sa NFA nga ang bugas nga tag-P25 unta ang matag kilo karon gipun-an og tag-P2 nga nahimo nang tag-P27 aron kuno dili malugi o maalkanse ang NFA ug aron usab makabenepisyo sa mga mag-uuma kay matod pa ni Banayo dako na og utang ang NFA.
Apan daghang mga mag-uuma ang nahisagmuyo. Dili man kuno tinuod nga sila ang makabenepisyo. Dili naman hinuon kuno mahalin ang ilang mga abot. Dugang sa kalbaryo karon hasta ang commercial rice dealers mopatong na og tag-P2 ngadto sa tag-P3 matag kilo sa ilang paninda.
Unsa bay nakaon niining pipila ka opisyal sa atong kagamhanan nga inay motabang sa atong mga kabus nga mga kaigsoonan bisan lang og niining panahon sa bag-ong tuig, giduot man hinuon sa kauyamot ang katawhan. Kaayo ninyong tubahon aron mo magpugsit.
Wala kamoy batikon! Mga bato ang inyong kasing-kasing! Asa man han-ok ang tanang mga kalisdanan niining gibuhat sa kagamhanan? Dili ba ang mga kabus, ang mga uyamot nga walay tinong kapanginabuhian? Ang mga timawa nga walay bugas nga ikasugpoy sa nagkutoy nga mga tiyan. Por dios por santo, naminhod na ba kanang inyong mga utok nga dili na mobati og tumang kaluoy?

Motor, tricycle nagbanggaay

ni Dante Raden
USA ka motorsiklo ang nidasmag sa laing motor ug tricycle niadtong Disyembre 29 sa Cogon, ning syudad nga niresulta sa pagkaangol sa tulo ka tawo. Ang nakadasmag mao ang Rusi nga motorsiklo nga gimaneho ni Michael Patac, 21-anyos, taga-dalan F. Ablen sa maong barangay.
Matud pa nga nagdagan si Patac sa dalan Lilia padulong syudad 6:45 nianang gabhiona. Dihang duol na siya sa Shell station, nitabok siya og kalit sa pikas linya aron magpatubil unta apan nasaghiran niya ang nag-unang motorsiklo nga muliko sad sa gasolinahan.
Ang naigo usa ka Kawasaki GX 130 nga gidala sa sundalo nga si Albert R. Mangalo, 22-anyos, ulitawo, taga-Samar ug nakadestino sa Special Civilian Army Auxiliary sa 52nd IB. Nayabo ang sakay sa maong Kawasaki lakip ang sundalo ug ang duha ka pasahero niini nga wala mailhan.
Apan dili lang kadto ang naamong. Nidiretso ang sakyanan ni Patac ug nidasmag sa nagsugat nga tricycle nga gimaneho ni Francisco Laurente. Wala maunsa si Patac ug lubat lang ang himaya niya kay wala man diay lisensya ang kanahan. Nahulog sa pagsinabtanay ang tanan tungod kay dili kaayo seryoso ang pagkaangol sa mga sakay ni Mangalo.

Christmas party sa Cogon niresulta sa kaguliyang

ni Dante Raden
NABULABOG ang victory ug Christmas party sa mga barangay opisyal sa Cogon, ning syudad niadtong Disyembre 28. Nahitabo ang insidente mga 11:00 sa gabi-i paglakaw ni Meyor Eric C. Codilla ug mga konsehal sa syudad nga nibisita sa maong okasyon.
Nagsugod ang kaguliyang sa parlor games dihang usa ka ulitawo ang gisumbag sa laing lalaki nga nangapil sa paduwa. Nasuko ang ina-ina nga tomboy sa gisumbag nga nailhan og Bebe Laurente, taga-Purok Dahlia sa maong dapit. Iyang gipahimungtan si Kag. Luis A. Ycoy, 53-anyos, minyo nga maoy nag-apod-apod og lechon ug Tanduay sa mga nitambong.
Gikwelyuhan ni Laurente si Ycoy hasta ang bag-ong kapitan nga si Engr. Godi Ebcas.  Matud pa isog ang maong tomboy sa ilang lugar ug nanulong na kaniadto nga nagdala og Samurai nga espada. Dili lang mao ang kagubot nga nahitabo kay aduna pay nag-smash og botelya sa maong party.
Sa laing bahin, nagkaguliyang ang mga tawo tungod sa usa ka hubog nga nagbahis sa merkado publiko pasado 12:00 sa udto niadtong Enero 1. Ang gitiner sa Presinto 1 ginganlan og Benjie Gallieta, 28-anyos, ulitawo nga nagpuyo sa Libertad, dinhi sa Ormoc.
Nirespondi ang mga sakop sa React Team nga gipangulohan ni PO2 Rey Francisco ug ilang naabtan ang gikatahapan nga basa ug naghukas, naka-short pants lang, nagwara-wara ug nagsige og masyada. Giam-aman siya lapoan sa mga pulis apan wala gyud mopatuo hinungdan nga gipugos kini og dala ug gipaslak sa presohan hangtud nahowasan.

Sekyu nag-inom gitulis hinuon

USA ka security guard ang gitulis sa hinlo niadtong Disyembre 29 sa jeepney terminal. Ang reklamante mao si Guirino Zarsosa, 49-anyos, minyo ug nagpuyo sa Isla Verde, ning syudad. Maoy gikatahapan ang batog nga nailhan lang sa ngalang Randy, walay tinong gipuy-an ug magkanunayan sa terminal.
Sa tahong nahipos, nasayran nga gikan si Zarsosa sa iyang trabaho sa Milagrina Restaurant ug nihapit sa Filipino Bakery sa terminal pasado 2:00 sa kaadlawon kay magpahayahay una usa mouli. Niduol kaniya si Randy ug gipangayo ang iyang polseras nga nagkantidad og P1,000 ug ingon man ang iyang kuwintas nga nagkantidad usab og P1,700. Daw sa walay nahitabo, hilom kaayo ang paagi sa tulis. Nagtuo ang biktima nga naay daghang kauban ang gikatahapan mao nga iya na lang sab gihatag ang iyang mga butang. ni Dong Arañez

2 ka preso naabswelto, gibuhian

USA ka managpuyo ang gibuhian sa city jail niadtong bisperas sa Pasko. Ang duha ka detinado mao sila si Monasimban Limbona ug Marissa Cabibi nga nadakpan kaniadtong 2008 pagronda sa ilang panimalay. Gikasuhan sila pagsupak sa Akta Republika 9165 o Dangerous Drugs Act. Apan gi-dismiss ang ilang kaso sa korte tungod kay wala daw lig-on nga ebidensya batok kanila. Matud ni Cabibi, malipayon sila ni Limbona nga mag-selebrar sa Pasko kay duha ka Pasko nga wala nila ikauban ang ilang anak. ni Elvie Roman-Roa
(West Leyte Weekly Express Dec. 27, 2010-Jan. 2, 2011)

Biktima og salvage napalgan

USA ka patay nga lawas ang napalgan sa Dolores, ning syudad mga 6:00 sa buntag niadtong Enero 1. Nakit-an sa Sitio Caglimba, singko kilometros ang gilay-on gikan sa kalsada ang biktima nga nailhan lang sa alyas nga “Patitoy,” walay tinong gipuy-an nga natumod sa iyang kaugalingong dugo.
Dunay pito ka samad dinunggaban si Patitoy nga anaa sa wala ug tuong bahin ubos sa ilok, tulo sa dughan ug sa likod nga bahin. Si PO1 Sherwin Mabale sa Scene of the Crime Operatives nagkanayon nga malagmit nga gitabangan ang biktima og duha ngadto sa tulo ka tawo. ni Dong Arañez
(Dec. 27, 2010-Jan. 2, 2011 issue)