(Column ni Mr. Lungsoranon)
ISIP Lungsuranon ug yanong magbubuhis, sulayan ko paglingi bisan sa makadiyot ang tuig 2010, pamasinm nga duna tay mahagpat, maayo man o dautan, aron atong mahisgutan ug ikapaambit sa atong mga binating lungsoranon. Dunay panultihon sa Tagalog nga nagkanayon: “ang hindi marunong lumingon sa pinanggalingan ay hindi makararating sa patutunguhan.”
Unsa ba ang mga dagku ug mga maayong panghitabo sa atong dakbayan sa bag-ong migikan nga tuig 2010? Ang pagkahuman sa bag-ong City Hall ug pagbalhin sa serbisyo sa Gobyerno Lokal gikan sa karaang city hall nganhi sa hamugaway ug modernong Balay Lungsod.
Ang malampusong pagladlad sa mga dagkong tubo sa tubig gikan sa city proper ngadto sa utlanan sa Merida, Kananga ug ang padulong sa Albuera ana-a sa Brgy. Ipil.
Ang pagtudlo og dugang mga doktor, nars ug comadrona sa mga 3-in-1 building sa syudad aron ang serbisyo sa maayong panglawas moabut ngadto sa kinahilitang dapit sa atong dakbayan.
Ang malampusong pakig-alayon sa Gobyerno Lokal sa Departamento sa Edukasyon nga miresulta sa pagpamarug sa mga tag-dos andanas nga school building.
Ang sinserong tinguha sa pagtabang sa mga igsoon tang Ormocanon nga desididong mopadayon pag-eskuwela bisan may edad na pinaagi sa pagbukas og mga tunghaan para kanila pinaagi sa Alternative Learning System. Padayon ang pagtabang nga ang night school sa New Ormoc National High School magmalampuson.
Ang pagkural sa mga tunghaan sa mga barangay.
Maantigo ug suhito na ang atong mag-uuma sa protected vegetable farming, greenhouse ug ubang modernong sistema tungod kay may suwerte kita nga ang Ormoc gihimong pilot area sa Visayas State University sa mga binag-ong paagi sa pananum ug paghatag kanato og mga bag-ong variety sa humay, mais ug utanon.
Ang pagtukod og freshwater fish hatchery and nursing project anha sa Integrated Agri-fisheries Demo Farm, slaughterhouse complex sa Macabug aron pagtubag sa kakulang sa supply sa isda. Maoy tinguha sa Bureau of Fisheries and Aquatic Resources nga hatagan ang mga igsoon ta sa Ormoc nga dunay fishpond og mga tilapia ug pongaseus fingerlings pamasin nga kini makatabang sa ilang inadlaw nga panudl-an u gang sobra niini makapono sa ilang kita.
Kun duna may makalipay sa mga panghitabo sa 2010, aduna usay makapasubo ug makapa-iknat sa kilay. Ang sunod-sunod nga holdap ug tulis nga nanghitabo sa atong pinanggang dakbayan, ang yano nga panglabni sa mga cellphone ug bag sa maglakaw tang mga igsoon sa adlaw nga dako.
Hinoon, salamat na lang nga 99% sa maong gma hitabo nasulbad sa atong kapulisan. Ngadto kang Direktor Nilo Donayre, hepe sa tulo ka presinto: PP1, PP2 ug PP3: Insp. Shevert Alvin L. Machete, Insp. Mark Nalda ug Insp. Harris Rebato, dawata ang among kinasingkasing pahalipay. Ipadayon ang inyong maayong trabaho.
Laing kadaugan sa atong kapulisan sa ilang pakig-gubat batok sa krimen mao ang pagdakop sa walo ka sakop sa Igorot Acetylene Gang nga ang mga sakop niini gikan sa nagkalain-laing dapit sa Luzon. Ato usab panghinauton nga ang pagsulod sa tuig 2011 maghatag og dugang grasya ug kalamboan sa pinagga tang dakbayan.
Pangayoon usab nato sa City Director, sa mga hepe sa tulo ka presinto nga ilang limpyohan ang ilang mga presinto sa mga pulis nga gikan sa ubang munisipyo nga scalawags, dunay binuhi nga mga drug addict, kawatan, holdaper ug mga akyat bahay. Ang inyong liderato masulayan kun unsa ka kasinsero ug kadeterminado pagtuman sa katungdanan.
Hangtod sa sunod semana, salamat.
(WLWE Jan. 3-9, 2011)
No comments:
Post a Comment