Magtutudlo gikawatan sa iyang tinun-an

ni Dong Arañez

USA ka magtutudlo ang nangayo og ayuda sa kapulisan human gisakiyo ang iyang mga butang sa iyang kaugalingong estudyante niadtong Enero 6. Ang reklamante nailhan nga si Rogelio Basas, ulitawo, lumad nga taga-poblacion, Giporolos, Eastern Samar ug nagtudlo sa Eastern Visayas State University.

Samtang ang naglabot sa iyang mga gamit mao ang iyang tinun-an nga si Roy Boy Pangan, 19-anyos, ulitawo ug silingan ra usab niya sa Cogon, ning syudad diin nag-abang siya og balay. Sa detalye nga nakuha gikan sa kapulisan, nasayran nga nakit-an mismo sa duha ka mata ni Basas nga gikan ang iyang tinun-an sa iyang gipuy-an.

Dakong kahibulong niya hinungdan nga iyang gisusi ang balay ug nasuta nga wala ang ang iyang white gold nga kuwintas gibana-banang mokabat sa P50,000, lima ka botelya imported nga alak ug ingon man P1,000 nga salapi. Tungod niini, iyang gipaabot sa kapulisan pamasin nga makuha og balik ang iyang mga gamit ug kuwarta. 

(WLWE Jan. 3-9, 2011)