NAKADUNGOG ka nab a sa panultihon nga moingon sila nga ang kabaw ray matigulang? Ug sa lain pa gayod nga panultihon nga Linatin: “tempura mutantur, et nos mutamur in ilis” nga sa ato pang Binisaya – “Ang panahon kanunay nga nagaisdog, ug kita mouban pag-isdog sa panahon.”
Karong bulana moabot na ang akong edad og 78. Tigulang na gayod. Apan lagi dili gayod nato kalikayan ang pag-abot sa panahon ug mohugpa ang kilum-kilom sa atong kinabuhi. Ang tinuod, dili angayan nga itago ang atong edad. Usahay kon adunay mangutana kanako, ako silang tug-anan nga hapit nako mo-78.
(Issue of Sept. 26-Oct. 2, 2011)
Usahay may mga batan-ong babaye nga mangutana, ako silang tug-anan nga 78 na. Unya sila mosumbalik, “Tinuod noy nga 78 ka na? Mora man lang og 50 pa.” Mahibalo ko nga komedya lamang kining ilang gisulti dalang ulog-ulog, pero lalim ug maanindot nga huni sa atong paminaw.
Dako ang akong pasalamat sa Makagagahom nga gipaabot pa Niya ko sa maong edad. Kasagaran god sa mga batan-on karon tigulang na tan-awong sa edad nga 40-anyos gumikan sa droga ug abuso sa panglawas.
Karon nga may dako na kong edad, ubay-ubay na ang akong gimulo ug suki na nako ang mga sakit-sakit. Apan sumala pa sa Iningles, “life must move on.” Padayon tawo, padayon pagpanaw, padayon pagbaklay ning walog sa kaluhaan, antosa ang kasakit, kataspok isalikway kay kadaogan unya sa pag-antos maoy bugti.
Karon nga nagkatigulang ka na ug retirado na, may panahon ka na sa pag-atiman sa hmong hardin. May panahon ka na aron pagsud-ong sa pagbuswak sa mga bulak sa hmong tanaman ug makahigayon ka na paghanggap sa kahumot sa imong Sampaguita.
Ug sa akong mga utanon sa tanaman, makautan nako sa akong mga pechay, okra, talong ug mga galay sa kamote gawas sa akong mga kamatis ug mga tasal nga Hutton pagtuktok sa mga langgam ug manok. Kon kaniadto dali kang mosinta kon makadungog ka og mapait nga mga pulong, karon mapasayloon ka na, kalma ug dili na init ang ulo.
No comments:
Post a Comment