Nalapsaw na ang pagbati

Dear Ruby,

Ako si Bebot, dunay koy kapuyo. Medyo sayo pa ko nasulod sa usa ka sersoyo nga realsyon, 20-anyos pa lang ko adto mao nga makaingon ko nga linghod pa ko adtong panahuna. Pero sulod sa 13 ka tuig sa among relasyon, maayo man ang among pamuyo. 

Naa mi duha ka anak, usa ka 12-anyos nga babaye ug 8-anyos nga lalaki. Wala pa mi nakasal tungod sa pinansyal nga problema. Nagkasabot mi nga magpakasal na unta sa sunod tuig kay medyo nakatigom naman mi. Pero karon nagkaproblema ko kay sa dili nako ma-esplikar nga rason, mura’g nalapsaw ang akong pagbati ngadto sa akong kapuyo. Nagduha-duha ko nga ipadayon na ang akong pagpakasal ka niya.

Ingon man gud Rub, naa koy nagustohan nga laing babaye, silingan ni sya sa kauban nako sa trabaho. Ganahan gyud ko niya apan minyo na pod sya ug nay tulo ka mga anak. Nagkagusto gyud ko pagmaayo niya mao nga pirmi ko muadto sa balay sa akong kauban aron lang makakita ko niya mao nga akong nasayran nga nagkaproblema sila karon sa ilang pamilya.

Ang akong gikalibgan karon mao ni: unsa man, ipadayon pa ba nako ang akong pagpakasal sa akong kapuyo nga nalapsaw naman ang akong pagbati ka niya? Unya, ipaporsiger ba nako ang akong plano nga panguyaban kining laing babaye? Kay kahibalo gyud ko nga kung ako siyang tingohaon dili gyud ko mapakyas sa iya. Hatage ko’g tambag be. Salamat.

                                                                                                                                      Bebot

Hello Bebot,

Sa imong gihatag nga sitwasyon, wala man koy nakit-an nga problema kay una, ulitawo ka man apan naa kay kapuyo ug medyo dugay na mo unya naa na pod moy duha ka mga anak. Pero dunay kalibog karon sa imong kaugalingon kay ingon pa nimo nalapsaw na ang imong pagbati ngadto sa imong ka kapuyo mao nga dili na lang ka mupadayon sa inyong plano nga pagpakasal.

Para nako dili lalim ang 13 ka tuig nga panag-uban. Lawom na gyud nang inyong relasyon ug dali na mawala. Sa termino nga imong gigamit nga nalapsaw na, sayon ra na -- naa may daghang pampa-ispiso karon, pili lang ka. Naa ra na sa imo kung ikaw gusto ba nimo nga pa-ispisohon og balik o paundayunan na lang nimo ang kalapsaw. Huna-huna-a baya nga naa na moy duha ka anak, dagko na. Ug nagdako sila nga kauban ka nila sa ilang kiliran. Kaya mo ba nga mubiya sa ila tungod lang anang imong gipasangil nga pagkalapsaw?

Ang imong asawa nagdahom nga matuman ang inyong kasal. Imagine, 13 ka tuig siya nimo nga gipahuwat kay walay budget, karon nga naa na basta-basta na lang nimo siyang i-disappoint kay naa kay nakit-ang lain? Maayo unta kanang lain walay kabilinggan sa kinabuhi.

Nganong tuyuan pa man nimo ang maguba ang inyong isig ka pamilya? Pag-focus sa imong kaugalingong pamilya. Sulbara nang imong kaugalingong problema sa pagkalapsaw. Dili ko motoo nga dili na ninyo masulbad kay sa ka dugay na ninyong panag-uban, daghan na mong problema nga naagian ug nasulbad nga nag-uban mo.

Sagdi tong problema sa pikas babaye sa iyang pamilya, wala kay labot ato nila. Unsay pagtoo nimo sa imong kaugalingon, lifeguard nga andam muluwas sa relasyon sa naay relasyon samtang ang imong kaugalingong relasyon dili nimo sulbaron? Ang pagtalikod sa problema dili maoy solusyon. Dili na kasulbaran nga imong biyaan ang usa ka problema pinaagi sa pagsulod sa mas labing dako na hinuon nga problema.

Pakig-istorya sa imong asawa. Sultihi siya kung unsay imong nakita nga kausaban sa imong asawa nga tengali maoy nakapalapsaw sa imong pagbati niya aron makahibaw siya. Sigurado ko willing niya nga ayohon para nimo. Hala sige, hatage ko’g feedback ha kung unsa nay dagan sa inyong relasyon ug kung asa man gyud imong gipili.

                                                                                                                                         Ate Ruby