Amahan gimolestiya ang 3 ka mga anak

ni Elvie Roman-Roa
USA ka amahan ang gidakop sa pulis niadtong Biyernes Santo, Abril 22 tungod sa paglugos sa iyang kaugalingong anak. Ang gikatahapan nailhan nga si Sozimo Antolihaw, 55-anyos, nagpuyo sa Cagbuhangin, dinhi sa Ormoc. Siya gikasuhan sa paglugos sa niyang anak nga si Angel (dili tinuod ang ngalan), 16-anyos.
 

Ang kamaguwangan nga igsuon nga si Evita (dili sad tinuod ang ngalan), 30-anyos ang nangayo og ayuda sa kapulisan human mitug-an ka niya ang manghod nga gilugos siya sa ilang amahan niadtong Huwebes Santo sa 7:00 sa buntag samtang nagdekorasyon sa kapilya ang ubang sakop sa pamilya.
 

Matud sa biktima nga gisugdan siya og lugos sa iyang amahan niadto pang nuwebe-anyos siya sa nagtungha pa siya sa ika-upat nga grado. Wala sad mubalibad si Antolihaw sa pasangil ug nag-ingon nga nahimo niya ang maong salaod kung mahubog siya. Wala daw mubalibad ang iyang anak sa iyang gibuhat.
 

Bisan gani ang manghod ni Angel nga 12-anyos nagreklamo sad nga gisugdan na siya og molestiya sa ilang amahan. Hasta pud ang kamaguwangan nga si Evita niagi diay sa mga kamot sa amahan sa dihang nag-edad pa siya og 13 hangtod 15-anyos. Nakapuyo pa gani siya sa Lingap Center tungod niini hangtod nga nilarga siya’g Manila aron manarbaho.

 

Matud ni Antolihaw nga andam niyang ang silot sa iyang salaod. “Tinuyuan man ni nga sala, papreso na lang ko; tingali’g maghikog pa hinuon ko kon makagawas ko kay makonsyensya ko,” ingon pa niya. Ang gikatahapan adunay walo ka anak ug gikasuhan na siya sa paglapas sa Akta Republika 7610.

(West Leyte Weekly Express issue of Apr. 18-24, 2011)