Kawatan nakuhaan og drogas

USA ka lalaki ang nakuhaan og drogas dihang gidakop siya sa salang pangawat 3:00 sa hapon kaniadtong Setyembre 5. Ang gireklamo mao si Vicente Vidauretta, taga-Dist. 10, ning syudad nga gipadakop sa iyang ig-agaw nga si Valerie Anne V. Maglasang ug lola tungod sa pagpangawat og telebisyon, DVD player ug blender.

Pagdakop kang Vidauretta, aduna diay kini dalang gamay nga kahon nga plastic nga gisudlan og mga shabu. Gisuksok ang maong kahon sa iyang hawak ug pagsakay niya sa patrol car, pasimple niyang gihulog ang maong kahon ilawom sa lingkuranan. Apan nakit-an nila ni Insp. Ariel Nuñez ang maong kahon ug giutingkay kini.
Aduna kini sulod nga unom ka gamay nga paketeng shabu apan gihimakak ni Vidauretta nga iya ang maong kahon. Ang pagdakop sa gikatahapan gisaksihan nila ni Kapitan Glenn Aparis ug Riday Pidoy nga maoy nagrepresentar sa Departamento sa Hustisya.
(WLWE issue of Sept. 5-11, 2011)