Mga NGOs ug kooperatiba sa Ormoc

DILI malalis ang dakung natampo sa mga kooperatiba ug NGO sa panginabuhi ug pagkabutang sa ubay-ubay tang kaigsoonan dili lang dinhi sa pinangga tang dakbayan kun dili sa ubang syudad, munisipyo ug probinsya. Apan yuna pa, dili hinoon ang tanang NGO ug kooperatiba ang malampuson ug sinserong mituman sa ilang tagsa-tagsa ka mission and vision.

Duna hinooy ubang kooperatiba ug NGO nga human sa ilang pagpanumpa sa katungdanan sa ilang opisyales, ug ato usab nabatian nga human makadawat og daku-dakung kantidad sa salapi gikan sa laing NGO sa gawas sa nasud, kalit kining nahilum ug wala na nato hibati-i ang ilang kalihokan.

Si Mr. Lungsuranon gibati’g kasibut paghisgot niini human nako ikahinabi ang pipila ka higala nga matud pa nila dili na sila modali-dali pag-apil og mga NGO ug kooperatiba tungod sa ilang dili maayong salapi. Karon wala na sila makasabut kun buhi o patay na ba ang ilang grupo.

Kita dinhi sa Ormoc atong dakung kalipay nga duna tay kooperatiba nga takus tang ikapasigarbo – ang Ormoc Community Credit Cooperative Inc. (Occci). Ang Occci atong ikatanding sa usa ka gamay nga kahoy nga gialimahan sa makugihong mga kamot sa iyang mga miyembro, gibisibisan sa tumang pagmahal. Kini mitubo ug nanalingsing, ug ang iyang mga sanga miabot na sa ubang munisipyo, syudad ug probinsya.

Sa mga opisyales, board of directors ug mga miyembro sa Occci, si Mr. Lungsoranon mokuyog sa baga-baga nang hut-ong sa katawhan nga nakapahimulos ug nakatilaw sa inyong tabang ug serbisyo sa paghinaut nga ang tuig 2011 mahimong saksi sa padayong pagtubo sa inyong kooperatiba.

Laing kooperatiba nga dili maayong kalimtan paghisgot mao ang CFI nga mitunol sa Ilang mga kamot pagtabang sa mga kaigsoonan tang nanginahanlan. Mga magtutudlo, mga barangay kapitan ug konsehales ug ubang mga empleyado pribado ug sa gobyerno, mga negosyante, ila usab nga mga kliyente sa CFI. To all CFI officials, board of directors and members, more power.

Si Mr. Lungsoranon manghinaut nga niining atong paghisgot sa kalampusan nga nakab-ut sa Occci ug CFI mahimo kining inspirasyon ug hagit sa ubang mga opisyal ug miyembro sa ubang kooperatiba nga mora’g nahikatulog sa ilang gihuptan nga kaakohan. Ato silang hangyoon pag-double time aron dili sila hibiyaan ning atong biyahe sa kauswagan.

Karon, atong isunod paghisgot ang mga NGO. Si Mr. Lungsoranon mangayo’g pasaylo daan nga tingali’g nasayop ako nga dinhi sa Ormoc wala pay NGO nga nakahimo og dako-dakong kalihokan nga napahimuslan sa ubay-ubay tang kaigsoon. Duna tay nabatian nga pipila ning maong mga NGO nakadawat na’g minilyong gahin gikan sa funding agency sa gawas. Hain kini padulong? Walay usa kanato ang nasayud. Mao ray klaro niini ang ilang mga opisyal. Ang gigamitan sa kuwarta nga ilang nadawat hanap-hanap. Matud pa sa akong higala ang mga opisyal visible, ang proyekto invisible. He he he.

Dugang kasayuran nga atong nadawat nga dunay opisyal sa NGO nga dako na’g yuta sa bukid, gipabuhatan na’g swimming pool, nindot na’g sakyanan, apan ang iyang mga miyembro baktas-baktas lang gihapon. Pastilan, kun kining maong mga opisyal maoy magdaghan, diyutay ra.

Hangtod sa sunod semana…salamat.
(West Leyte Weekly Express Jan. 10-16, 2011 issue)