Ako si Rico, minyo ug dunay liwat. Naa koy asawa ug anak apan naa koy naibgan nga laing babaye. Ganahan kaayo ko ka niya kay maayo siya muatiman sa iyang pamilya. Ubay-ubay na pod iyang anak pero na-maintain man gihapon niya ang iyang figure.
Taud-taud na nga ganahan ko ka niya ug karon makaingon ko nga na-in love na gyud ko kay mingawon naman ko kung dili ko makakita sa iya. Wala man hinuon nako biyai akong pamilya kay sikreto ra man ning akong pagkagusto sa iya. Okey sad ang iyang treatment ka nako.
Lambing kaayo siya sa iyang inistoryahan ug linihukan mao nga usahay ma-imagine nako nga nag-uban mi nga kami rang duha. Kung naa gani siyay ipamarayeg sa ako nga botang o duna siyay isugo, musugot dayon ko kay ganahan lage ko nga silbihan siya ug mura’g kalami gyud niya panggaon. Magkasumpaki man gyud mi sa rason ug sa ubang botang sa akong asawa pero sa kini nga bayhana mura’g mapildi gyud ko sa rason pirmi. Mao nga nakaingon ko nga nakakita ko’g katapat kay bisa’g maglagot ko ka niya dili man ko musupak. Mao nga mangeta na lang ko’g paagi nga mapatumanan gyud nako siya.
Unsa man, padayunon pa ba ni nakong pakigsood ani nga bayhana? Dili ko gusto mawala siya sa akong kinabuhi. Okey na nako nga naa siya diha pero ang problema lage kay mura’g nagselos na akong asawa. Tambagi daw ko be. Rico
Dear Rico,
Dili man problema ang imong sitwasyon. Mubo ra gyud akong ikasulti sa imo. Naa man kay asawa unya kini pod nga babaye kaha naa may pamilya. Ayaw na himui’g komplikado pa. Kanang imong pagkagusto sa iyaha, ipusa na lang na diha kanimo labi na karon nga magselos naman kaha nang imong asawa. Tengali pod intawon og mabugnuan ni nga babaye sa imong asawa sa walay hinungdan.
Medyo naglibog lang ko sa imong geingon nga mangeta ka’g paagi nga mapatumanan siya sa iyang gusto. Ngano man diay, naa na siyay gipangayo sa imo nga mga botang? Kung mga pamalihog lang nga ginagmay okey ra siguro pero kining imong geingon mura’g dako-dako na gyud ni nga botang.
Ganahan ka sa iya kay tengali ma-challenge ka sa iyang reasoning power kay nakakita ka man lage kaha og katapat kay ang imong asawa madala ra man sab tengali nimo sa hurat. In love sab siguro kaayo sa imo ang imong asawa mao nga siya ang angay pagbalingan nimo og pansin.
Hinaot naklaro na gamay ang imong huna-huna. Kung unsa man nang imong gibati ana nga babaye, buhi-i na kay wala kay padulgan ana. Sa atong mga tigbasa, giawhag mo nako sa pagpadala sa inyong mga suliran ginagmay man o dinagko, pangetaan na nato og kasulbaran. I-text ko sa 0948-700-2557 o i-email sa espina_ruby@yahoo.com.
(West Leyte Weekly Express Jan. 10-16, 2011 issue)
No comments:
Post a Comment