All out war o all out justice?

NAUNSA ba ang atong  Presidente nga lisod man espilingon ang iyang baroganan? Paabuton pa ba niya nga mahurot ang atong mga kasundalohan una pa ta motinuod pagbalos? Kay tan-awa ra gud, didto sa Albarca l9 ka sundalo ang giihaw sa mga way puangod nga sakop sa MILF ug laing unom ka kinabuhi ang nakalas didto sa Sumisid, Sibugay lakip na ang pulis ug usa ka Cafgu. Ug laing duha ang napatay didto sa Lanao del Norte.

 

Nakapaluya kini sa hanay sa atong mga militar. Gani, giingon nga aduna nay mga opisyal sa kasundalohan nga buot na lang moluwat sa ilang active duty. Ubay-ubay na ang nagadismaya sa baroganan sa Presidente nga matod pa niya gusto lang siya og all out justice. Gani, sa survey nga gihimo sa ABS-CBN nga motuo ba kita nga adunay hugon-hugon nga destabilisasyon sa hut-ong sa atong mga militar, 73% ang nagtuo ug 27% ang wala magtuo.

Sila si Kongresista Rodolfo Biazon ug karon kongresman ug Sen Panfilo Lacson, kanhi Presidente Joseph Estrada ug diha pay uban nga gusto na gayod og all out war sa katarungan nga sobra na ang pag-abuso sa MILF nga dili lang gayod morespeto sa nagpadayon nga sabot-sabot sa kalinaw. Kanunay kini nilang gilapas.

Sila si Al Haj Mura dug Ghadzali Jaafar, mga dagkong haligi sa MILF, defensive kaayo nga manubag sa mga interbyu kanila. Kon tinuod pa sila ug sinsero sa ongoing peace talks tali sa gobyerno ug MILF, dili unta sila mag-una-una sa pagpangatake sa atong mga kasundalohan o kahay ilang sikopon ang ilang mga sakop nga nagbuhat og dili maayo ngadto sa atong mga kasundalohan.

Maayo gani kay gisugdan na sa militar ang pagpamomba sa gikotaan ni Waning Abdusalam. Sa pagsulat niin (Oktubre 27) giingon nga giliyokan na nila ang kuta niini ug dili makaipsot sa opensiba sa atong kasundalohan. Unya pait sa mga pait pa gyod, ang Presidente naghatag diay og P5 milyon ngadto kang Al  Haj Murad.

Sa pagkasayud sa ubang mga magbabalaod bahin niining P5 milyon nga gihatag sa Presidente, naukay na sila kon giunsa paggamit sa MILF ang maong salapi. Dili kaha maora usab kiniy ipamalit mga bala ug armas? Kaluoy intawon sa atong mga sundalo nga gisahon sa kaugalingon nilang mantika.

Kining mga panghitabo karon sa Zamboanga ug Basilan takos na nga makapaiknat sa atong kilay. Angayan na gayod kini nga hatagan sa seryosong pagtagad sa atong kagamhanan. Daghan na kaayong mga masaaron nga mga batan-ong opisyal sa militar nga nauyamot sa mga sinalbahis sa MILF.

Tiaw moy mga marines ug pipila ka sundalo panglunggoan sa liog, hiwa-hiwaon ang ubang parte sa lawas. Manghinaut lang ta nga unta makubsan ang pagpangamatay sa atong mga kasundalohan. Subo kaayo nga Pilipino batok Pilipino ang nagkasangka o ato na lang kahang ingnon Pilipino batok moros.

(Issue of Oct. 24-30, 2011)