In-love si Manang

Dear Inday Ruby,
Maayong adlaw kanimo ug sa tanan mga suking magbabasa ning imo column. Ako si Delia, 49-anyos. Taga-dinhi ra ko sa Ormoc ug nagtrabaho sa usa ka tindahan. Usa ako ka byuda ug bag-o pa lang nakakita og usa ka batan-on nga uyab. Bata pa gyud intawon siya kaysa akong mga anak.

Usa siya ka tinun-an sa kolehiyo apan ingon siya nga lain ang iyang gibati kay sa una niyang uyab nga batan-on usab sama kaniya. Ang ako lang kay medyo hilasan man gud ko kay kabata pa niya, apan masuko siya kon dili ko moingon og “I love you,” mura’g kalisod tubagon, murag manlibawot gyud ako balhibo.

Kausa niana gihangyo ko niya og phone sex. Matabang mo na ‘day? Mao may among hinongdan sa away ug hangtod karon mao lang gihapon kami, wala pa gihapon nako madawat kon unsa ang iyang batasan sa pagkadali gyud masuko ug dili nako tubagon sa iyang isulti sa iyang gibati, kay lagi kahilas gyud. Unsa ang angay kong buhaton niani kay dili gayod siya makigbulag nako kay karon pa daw siya nahigugma og tinud-anay? Unsa may anagyan kong buhaton ani niya? Intawon tambagi ako.        

Matinahoron,

Delia

Hala oy, pagbasa nako sa imong sulat, gikilig gyud ko. Kay imagine mo na, byuda ka na apan nakakaplag ka pa og love life uban sa usa ka batan-on. Wala nimo masulti kung nagduol ba mo o long distance ba ang inyong relasyon. Ang imo lang geingon kay gusto niya makipag phone sex, so I presume nga toa ni siya sa layo ug ang inyong relasyon nagsubay lang sa linya sa telepono.

‘Nang, naa na ka sa hingkod nga pangidaron so kahibalo ka na unsay tarong ug dili. Apan kay tengale nakilig ka kay nakauyab ka’g batan-on, wala nimo mahuna-huna sa makadaghan unsa ang sangpotanan niining tanan. Tinuod age doesn’t matter kung gugma ang hisgotan. Naa tay mga nabasahan ug nakit-an nga mga telenobela nga nagpakita kuntahay nga magkadayon ang mga nag-uyab nga layo ang agwat sa edad. Pero istorya lang na.

Tambag nako obserbahe lang usa ang inyo relasyon ug ayaw pakasiguro. Ayaw pagpalabi og padala anang mga kakilig nga imong nabati karon. Kini bayang mga batan-on tagsa ray tarong, hilig sila og trip sa buhay labi na og naa silay makuhang ganansya. Unya ang mga matured maoy himuong magtutudlo nila aron sila maka-experience.

Huna-hunaon og maayo ang imong kahimtang. Lisod baya ning masakitan ta. Maayo lang unta og kotob lang diha, unsaon na lang kung nahukasan na gyud ta? Hehe. Salamat sa imong sulat ug kinsa kadtong adunay prolema sa kinabuhi ipadala i-email lang sa: espina_ruby@yahoo.com o sa westleyte_express@yahoo.com.

(Issue of Sept. 26-Oct. 2, 2011)