Hilom nga pakigkita ni PNoy kang Murad

KANIADTONG Agosto 4, sikretong nakigkita si Presidente Noynoy Aquino kang Al Haj Murad Ibrahim sa MILF didto sa Tokyo, Japan. Nakaani kini og daghang reaksyon ug daghan ang nahisagmuyo sa katawhang Pilipinhon. Apan nganong didto man gayod sa Tokyo gihimo nga usa  ka hilom nga pakigtagbo?

Matod pa ni Prof. Marvic Leonen, dekano sa sa College of Law sa Unibersidad sa Pilipinas ug hepe sa panel sa gobyerno nga nakigsabot-sabot sa MILF, prangka ang panagkabildo ni Aquino ug Murad. Kini si Murad maoy chairman sa MILF ug siyay sibling hawod nila.

Matod ni Leonen, nagkauyon silang duha nga kinahanglang dalion ang panagkabildo alang sa kalinaw aron kini ika-implementar sulod sa termino ni PNoy. Diha-diha ang mga politiko, kaanib ug kaaway sa administrasyon, nagkahiusa sa pag-atake sa hilom nga pakigkita ni PNoy ug Murad.

Matod pa ni Sen. Chiz Escudero nga alyado ni PNoy nga wala unta kini buhata sa Pangulo tungod kay usa man siya ka leader sa nasod nga soberanya samtang si Murad dili — usa siya ka sisbilyan. Sahi da sa gihatagan ni Aquino si Murad og importantsya nga angay lamang sa usa ka leader sa usa ka independenteng nasod, pahayag ni Chiz. Usa kini ka sayop nga paagi pagsulbad sa suliran sa kagubot sa Mindanao.

Si Kongresista Edcel Lagman nga lider sa oposisyon sa Ubos Balay Balaoranan miingong nga walay maayong gikadulot ang maong gitago nga panagkita ngadto sa mga lungsoranong Pilipino. Tungod kay ang gikasabutan bahin man sa ikaayo sa nasod, dili kini angay nga itago, matod niya. Kon unsay gikasabutan ni PNoy ug Murad angay kining mahibaw-an sa nasod ilabina sa mga molupyo sa Mindanao, sumala pa kang Lagman.

Samtang ang uban midayeg kang Aquino nga kuno sinsero siya sa iyang tinguha nga masulbad ang dugay nang kagubot sa Mindanao, ang uban usab nag-ingon nagpakita lamang kini sa kanobatos ni Aquino sa arte sa pangagamhanan.

Sa iyang  paghatag og imprtansiya kang Murad nakabaton lamang og dugang kusog ang MILF sa pagpugos sa ilang mga gipangayo ngadto sa gobyerno. Karon maisugon na nilang iduso ang pagtukod og usa ka Bangsamoro sub-state nga matod pa nila maoy bugtong sulbad sa gumonhap sa Mindanao.

Ang sub-state, pulong pa nila, dili usa ka independenteng nasod ug ubos gihapon kini sa gobyerno sa Pilipinas. Apan ang MILF ang mopadagan niini lakip na ang pagtikad sa kinaiyanhong mga kahinguhaan sa mga dapit nga ilang sakopon ug ang pagmintinar sa kahusay ug kalinaw sa maong mga lugar. Magpabilin sa kagamhanan nasyonal ang nasodnong panalipod, kalihungang panglangyaw ug koreyo.

Migara na ang MILF human nila makita nga ingon sa nagakahuyang ang baroganan sa gobyerno tungod pakigkita ni PNoy kang Murad. Karon nangusog ang MILF nga kon dili ihatag ka nila ang sub-state, ipadayon nila ang pakiggera batok sa kagamhanan aron makab-ot ang una nilang katuyoan nga mao ang pagbulag nila sa Pilipinas ug magtukod og usa ka Republika sa Bangsamoro. Kining gidamgo sa MILF maoy usa ka dakong binuang kay supak man kaayo kini sa atong Konstitusyon.
(WLWE issue of Sept. 5-11, 2011)