USA ka motorsiklo ang gikawat niadtong Setyembre 7 sa gabi-i apan nabawi gihapon sulod sa duha ka orasa. Ang itom nga Honda XRM nga motorsiklo nga may plakang 1434 HB ang gipanag-iya ni Eugene A. Tubal, 18-anyos, nagpuyo sa Isla Verde ug estudyante sa Eastern Visayas State University.
Matud ni Tubal nga giparada niya ang iyang motorsiklo gawas sa Superdome nianang pasado 7:00 sa gabi-i aron manan-aw og dula sa basketball. Apan paggawas niya nahibolong na lang siya nga wala ang maong sakyanan didto sa gi-parking-an niini hinungdan nga nagpa-blotter siya sa Presinto 1.
Sa mao gihapong orasa, nagpahigayon og checkpoint si SInsp. Reo Tan ug mga kaubanan sa tulay sa Anilao sa Cogon. Mga 9:00 sa gabi-i adunay nilabay nga motorsiklo apan imbes nga mohunong sa checkpoint, mipatulin hinoon sa pagpadagan ang drayber ug nalahos didto kilid sa kapilya sa dalan Conejos, Purok Rosal.
Nahalowak ug nasukamod ang motorsiklo atobangan sa mga balay apan ang maong drayber padayon nga midagan, nagsuot-suot sa mga agianan likod sa kapilya diin daghan ang kabalayan nga squatter. Ang motorsiklo nga gibilin sa kawatan mitukma sa mga detalye sa kinawat nga motor ni Tubal. ni Dante Raden
(WLWE issue of Sept. 5-11, 2011)
No comments:
Post a Comment