Miyembro sa sindikato nasikop

USA ka miyembro og sindikato sa drogas sa Sugbo ang nadakpan sa mga autoridad niadtong Setyembre 7. Ang nadakpan mao si Cipriano Diano, 38-anyos nga taga-Benolho, lungsod sa Albuera. Nadakpan siya tungod sa pagpanghulga niya sa usa ka negosyante sa Ormoc.

Ang reklamante mao si Joel Mascariñas, tag-iya sa Mom’s Hardware nga nangayo og tabang sa Presinto 1 kay nagpunay daw og panghulga ka niya ni Diano pinaagi sa text pila na ka adlaw ang milabay. Naalarma sad ang mga pulis tungod kay nagpaila ang gikatahapan sa text nga siya si Rolly Pocson, usa ka banggiitang tigpayuhot og drogas sa Sugbo.

Busa, gipangitaan og paagi sa kapulisan nga makontak si Diano nga wala makaahibawo nga ang mga autoridad na ang nagsige og text kaniya. Hangtod nagsabot sila nga magkita sa Manina’s Eatery nga nahimutang kilid sa Superdome. Usa ka entrapment operation ang biplano sa kapulisan.
Nipuwesto ang mga pulis sa palibot diin magkita unta sila Diano ug Mascariñas gamit ang mga
pribadong sakyanan. Pag-abot sa gikatahapan, wala na siya maka-react dihang giposasan siya samtang nagpunay pa og text nga nagsakay sa iyang single nga motorsiklo.

Gidala siya dayon sa istasyon diin iyang giangkon nga siya ang nag-text kang Mascariñas nga iya lang daw gikomedyahan ug wala daw siyay dautang intensyon. Kanhi daw siyang drayber sa hardware ni Mascariñas sulod sa siyam ka tuid ug duha na ka tuig siyang miundang.

Gikumpirma sad ni Diano nga kauban siya nila ni Pocson ug Kerwin Espinosa, duha sa mga ngilngig nga tigpayuhot sa Sugbo. Sugid sa gikatahapan nga siya ang nagmaneho sa sakyanan dihang nadakpan sila si Pocson ug Espinosa kaniadtong 2010 pero apil siyang gikasuhan kay may nakuhang armas sa iyag duol sulod sa sakyanan. Nakagawas siya human makapiyansa og P13,000.

Nasayran gikan kang SInsp. Shevert Alvin Machete, hepe sa Presinto 1 nga gipaninguha nila nga ma-verify ang criminal record ni Diano kon duna pa ba kini laing kaso sa laing lugar. Gipasakaan siya og kasong grave threats ni Mascariñas.
(WLWE issue of Sept. 5-11, 2011)